Dis exciting, dis scary… dis lank voor gewag. Dis my woorde, my hart, my verlede- en toekomspad.
Dis gedigte, dis stories, dis feite, dis fiksie, dis lag, dis huil, dis te min en te veel. Ek het soveel om te gee, soveel om te deel,” sê die sanger en liedjieskrywer Deidré Barnard oor haar eerste kortspeelplaat, GENOEG GEWEES, wat nou aanlyn beskikbaar is.
Hierdie vrystelling, wat bestaan uit vier liedjies uit haar eie pen, is vernoem na haar gunsteling-snit op die album en beklemtoon die boodskap en tema, dat elkeen van ons van die begin af goed genoeg gemaak is en mense het wat ons liefhet en waardeer vir wie ons is.
Volgens dié Kapenaar het sy reeds in 2020 begin droom en bou aan die inhoud van die kortspeelplaat en gaan dit aanklank vind by ’n wye gehoor, maar veral by die jongklomp.
“Hoewel die oorhoofse genre pop is, is dit nie pop soos jy dit ken nie,” verduidelik sy. “Omdat ek elkeen van die liedjies self geskryf het, dink ek luisteraars kan ’n meer persoonlike ervaring te wagte wees.”
Oor BO AAN MY LYS, die nuwe enkelsnitvrystelling waarmee sy haar kortspeelplaat vier en wat deur Robin Kielly vervaardig is, sê sy: “Hierdie lied speel met die idee dat iets ’n prioriteit is vir jou of die heel eerste ding is waaraan jy in die oggend dink. Dit vertel ’n storie oor ’n vakansieromanse wat tydens ’n Desember in Hartenbos/ Mosselbaai afspeel. ’n Plek waar baie van ons al liefde gevind en verloor het en wat jou elke keer as jy teruggaan soontoe herinner aan ’n spesifieke persoon en hoe spyt jy is dat dinge nie uitgewerk het nie.”
Deidré is gebore en getoë in die Strand en sing al vandat sy kan onthou.
In die kort tyd sedert sy die musiekmark in 2018 betree het, het sy al – buiten vir die vrystelling van haar oorspronklike musiek – talle hoogtepunte beleef, wat insluit ’n platekontrak met Inhoud Huis Musiek en rolle in die gewilde musiekblyspele: Die Gelofte en Die Kaplyn.
Sy erken dat haar betrokkenheid by laasgenoemde haar baie na aan haar eie pa laat voel het.
“Ek kon tydens en na die produksie so lekker met hom gesels oor sy ervaring op die grens. Ek voel ook op ’n manier baie nader aan my pa en dat ek hom beter ken, want hy was omtrent so oud soos wat ek was terwyl ons die produksie aangepak het, toe hy op die grens was.”
Verder is sy ook ’n musiekonderwyser, wat vir laerskoolkinders en volwassenes leer sing en kitaar, ukelele en klavier speel.
Buiten vir ’n hele rits nuwe liedjies, het die sangeres nog baie opwindende planne vir 2024, maar sy kan nog nie op die stadium te veel hieroor verklap nie.
Die musiekbedryf het haar die afgelope paar jaar geleer om geduldig te wees, omdat alles op die regte tyd gebeur en sy is baie dankbaar vir elke geleentheid wat sy het om haar musiekdroom uit te leef.
“Moenie jou tyd Sy tyd probeer maak nie. Plaas die Here in beheer van alles. Hy sal jou optel waar jy weggeneem moet word, neersit waar jy moet gaan en jou bystaan elke tree van die pad,” sluit sy af.
Kry GENOEG GEWEES nou op alle digitale stromingsplatforms: https://DeidreBarnard.lnk.to/GenoegGewees
LYS VAN SNITTE:
Beskerm Jou Hart
Blond Is
Bo Aan My lys
Genoeg Gewees
SOSIALEMEDIAKSKALES:
Facebook: https://www.facebook.com/deidrebarnarddd
Instagram: @deidrebarnarddd
PUBLISITEIT & BEMARKING:
STARBURST PROMOSIES
Gizela Sharim
Sel: 083 399 6869
E-pos: gizela@starburstmusic.co.za
Webwerf: www.starburstmusic.co.za